دلڤین خەلەف*
ئافرەتا کورد ب گشتی ل درێژیا ژیانا خۆ وەکو ئەڤێ قووناغا نها ژیارا خۆ ب ئارامی دەربازنەکریە و ب تاما ئازادیێ شاد و بەختەوەر نەبوویە، ئەو ژی ژ ئەگەرێ ئەوێ زۆرداریا لێ دهاتە کرن ژلایێ داگیرکەران ڤە و ئەو ژیانا ب رەزالەت و دەردەسەری و بندەستی د وەلاتێ خۆ یێ داگیرکری دا بۆراندی.
گەلەک جاران ژ ئەگەرێ دلسۆزی و ئەختوباریا وێ زۆرداری ل ئافرەتا کوردستانی هاتیە کرن و ئەو ب توندی هاتیە ئێشاندن، بتنێ ژبەر کو ئەو د هەموو کاودانا دا دگەل جڤاکێ خۆ هەڤپشک و خەمخۆر بوویە، ودیسان د هەولێن سەرکەڤتنا و داخوازیا ژیانەکا ئازاد ل رۆژێن زەحمەت و تەنگاڤ هاریکار و پشتەڤان بوویە و بزاڤەکا ب هێز بۆ وەرگرتبا مافێ خۆ ژ داگیرکەران کریە و سەرەرایی ئەڤێ چەندێ ژی دناڤ جڤاکی دا ئەرکێ خۆ یێ مرۆڤایەتی ب سەرڕاستی ب جهئینایە و بوویە پێشەنگ بۆ نفشێ پاشەرۆژێ .
هەر وەکو دیار مرۆڤایەتی د سەردەمێ زانین و زانستێ دا یە و جیهان ب گشتی کەڤتیە قووناغا ئاڤاکرنا جڤاکێن شارستانی و پێشکەڤتنەکا مەزن ل سەرانسەری وەلاتێن جیهانێ د بوارێ هزر و بیروباوەران دا پەیدابوویە و دادپەروەریێ و وەکهەڤیێ جهێ خۆ د ناخێ گەلێن ژیر و زانا دا گرتیە و هەر ژ ئەگەرێ ئەڤێ پێشڤەچوونا سەردەمی مللەتێن بندەست ژی د هەولێن بەردەوام دا پێنگاڤان د هاڤێژن دا کو گەلێن خۆ ژ دەردێ نەزانینێ رزگاربکەن و هزر و بیرێن پاشڤەمایی وندا و بنئاخ بکەن و بەرێ خۆ بدەنە ژیانەکا ئارام و گەش ل سەر ئاخا وەلاتێ خۆ یێ ئازاد، و ئەڤێ چەندێ ژی پێدڤی ب قوربانی دانەکا مەزن هەیە ژ هەموو تەخ و چینێن جڤاک پێخەمەت گەهشتنا مەرەم و ئارمانجان.
دناڤ هەموو مللەتێن جیهانێ دا ئافرەتێ رۆلەکی پیرۆز د پێشکەڤتنا ئاستێ گەشەپێدانا جڤاکی دا هەبوویە و هەردەم ب وێرەکی ئەرکێ خۆ یێ مرۆڤایەتی ب دروستی ئەنجامدایە و بوویە سەدەمێ بەختەوەریا جڤاکێ خۆ د هەموو بوارێن ژیانێ دا و خۆ گەهاندیە ئاستێ بەرپرسیارەتیێ د رێڤەبرنا کار و خزمەتا گەلێ خۆ دا و بوویە پشکەکا گرنگ ژ هشیاریا جڤاکێ خۆ د بوارێ شارستانیەتا وەلاتێ خۆ دا.
هەروەسا ئافرەتا کوردستانی ژی د ئەڤێ قەووناغێ دا شیایە پێنگاڤێن سەرکەڤتی پاڤێژت و مفای ژ ئەڤێ پێشکەڤتنا سەردەمێ وەربگرت، و هەولدایە د بوارێ گەشەپێدانا جڤاکی دا جهێ خۆ بگرت و ببیتە پشتەڤانەکا ب هێز پێخەمەت هەبوونا وەلاتەکی سەردەمی، نەمازە پشتی کو گەلێ کوردستانێ بەر ب ئازادیێ ڤە ب رێکەڤتی و سەرکەڤتن د هەموو بوارین ژیانێ دا ب دەستخۆڤەئیناین و پێنگاڤێن باش بەر ب زانین و زانستێ ڤە هاڤێژتی و ئارامی دناڤ جڤاکێ خۆ دا پەیداکری و وەلاتێ خۆ ئاڤەدانکری.
*ئەنداما سکرتاریەتا ئیکەتیا ئافرەتێن کوردستانێ