عەبدولقەهار هەولێری
لە هۆڵەندا، یادی ٢٥ی ئەیلوولی ٢٠١٧ بە ئامادەبوونی ژمارەیەک لە کەسایەتی و نوێنەرانی دامەزراوە و ڕێکخراوە کوردییەکان، پێشمەرگە و دۆستانی کوردستان بەڕێوە چوو؛ بۆنەیەک کە لەگەڵ یادکردنەوەی ڕیفراندۆمی سەربەخۆیی، بایەخی مێژوو، ناسنامە، مافی دیاریکردنی چارەنووس و هیوا بۆ داهاتووی کوردستانی خستە ڕوو.
بۆنەکە بە سروودە نیشتمانیەکەی «ئەی ڕەقیب»ــەوە دەستی پێ کرد و ژمارەیەک لە کەسایەتییەکان، نوێنەرانی دامەزراوە و ڕێکخراوە کوردییەکان، پێشمەرگەکان و دۆستانی کوردستانی کۆ کردەوە، بۆ یادکردنەوە لە ڕووداوێک کە بەشێکی گرنگ لە مێژووی هاوچەرخی گەلی کورد پێک دەهێنێت.
وتاری ڕێکخەری بۆنەکە
بۆنەکە بە وتاری خاتوو ئاورنگ نەورۆز شاوەیس، نوێنەری دەزگای نێودەوڵەتی پێشمەرگە بۆ کاری مرۆیی لە هۆڵەنداوە دەستی پێ کرد.
شاوەیس لە وتارەکەیدا باس لە گرنگیی ڕیفراندۆمەکەی ٢٥ی ئەیلوول و مانای ئەو ڕۆژە بۆ گەلی کورد کرد و جەختی لەسەر ئەوە کردەوە کە مافی دیاریکردنی چارەنووس یەکێکە لە بنەما گرنگەکانی مافی نێودەوڵەتی و بۆ گەلی کوردیش ئەم مافە مانایەکی تایبەتی هەیە.
لە دیدی زۆرێک لە کوردانەوە، ڕیفراندۆمەکەی ٢٠١٧ دەربڕینی خواستی سیاسیی ملیۆنان کورد بوو بۆ دیاریکردنی داهاتووی خۆیان. ئەو ڕووداوە، هەرچەندە نەبووە هۆی دامەزراندنی دەوڵەتێکی سەربەخۆ، بەڵام وەک بەشێک لە مێژووی نوێی کورد و دەربڕینی دەنگی بەشێکی زۆر لە کۆمەڵگەی کوردی، لە یادەوەریی مێژووییدا ماوەتەوە.
شاوەیس هەروەها هیوا و ئومێدی خۆی بۆ داهاتووی کورد دەربڕی و، ئاماژەی بەوە کرد کە زۆرێک لە کوردان هێشتا هیواخوازن ڕۆژێک کوردستان بە شێوەیەکی ئاشتیخوازانە و لە چوارچێوەی یاسا و پرەنسیپە نێودەوڵەتییەکاندا بگات بە داهاتوویەکی سەربەخۆ.
باسکردن لە چالاکییە مرۆییەکان
دواتر، ڕزگار شێخ عەلی وتارێکی لەسەر کار و چالاکییەکانی International Peshmerga Humanitarian Foundation پێشکەش کرد.
ئەو باس لە ئامانج و بنەماکانی دامەزراوەکە و چالاکییە مرۆیی و کۆمەڵایەتییەکانی کرد کە ڕێکخخراوەکە لە ساڵانی ڕابردوودا کردوونی و، جەختی کردەوە لەسەر گرنگیی پشتگیری و خزمەتکردنی بەردەوام بە کۆمەڵگەی کوردی.
پاشان، شوعلە ڕەسوول یەکێک لە ئەندامانی ڕێکخراوەکە، وتارێکی لەسەر ڕیفراندۆمەمەکەی ٢٥ی ئەیلوول و مانای ئەو ڕۆژە بۆ کوردان پێشکەش کرد.
ئەو ئاماژەی بەوە کرد کە ڕیفراندۆم تەنها پرۆسەیەکی سیاسی نەبوو، بەڵکوو بۆ زۆرێک لە کوردان دەربڕینی ناسنامە، هیوا و خواستی دیاریکردنی داهاتووی خۆیان بوو.
یادکردنەوە و پاراستنی مێژوو
لە بەشێکی دیکەی بۆنەکەدا، عومەر زاوێتەیی بە ناوی نوێنەرایەتی LQI 6ــەوە سوپاسی International Peshmerga Humanitarian Foundationــی کرد بۆ ڕێکخستنی بۆنەکە.
ئەو جەختی لەسەر گرنگیی بەڕێوەبردنی بۆنە یادەوەرییەکان کردەوە و، وتی یادکردنەوەی ڕووداوە مێژووییەکان بۆ کۆمەڵگەی کوردی گرنگە، چونکە ئەم یادەوەریانە بەشێکن لە پاراستنی مێژوو و ناسنامەی گەل.
هەروەها رائد خاتی شنگالی سوپاس و پشتیوانیی خۆی بۆ ڕێکخستنی بۆنەکە دەربڕی و باسی لە گرنگیی بابەتی سەربەخۆییی کوردستان کرد.
ئەو ئاماژەی بەوە کرد کە بابەتی سەربەخۆیی بۆ بەشێکی گەورەی کۆمەڵگەی کوردی هێشتا بابەتێکی گرنگە و مانایەکی مێژوویی و نیشتمانیی هەیە.
لە هەمان بۆنەدا، پێشڕەو حەسەن، بە ناوی ناوچەی هۆڵەنداوە دەستخۆشیی کرد لە دەزگای نێودەوڵەتی پێشمەرگە بۆ کاری مرۆیی لە هۆڵەندا، بۆ ئەوەی بۆنەیەکیان ڕێک خست بۆ یادکردنەوەی ڕیفراندۆم و گرنگیدان بە پاراستن و زیندووڕاگرتنی یادەوەریی ئەو ڕووداوە.
ئەو هەروەها ئاماژەی بەوە کرد کە ناوچەی هۆڵەندا هەمیشە پشتگیریی چالاکییەکانیان دەکات بۆ خزمەتکردن بە پێشمەرگە.
ڕێزگرتن لە پێشمەرگەکان
لە ئاخرەوەی بۆنەکەدا، ژمارەیەک لە پێشمەرگەکان بە بڕوانامەی سوپاس و ڕێز خەڵات کران، وەک دەربڕینێک بۆ ناساندنی خزمەت و ماندووبوونیان و ئەو ڕۆڵەی لە پاراستن و خزمەتکردنی گەلەکەیاندا گێڕاویانە.
لەو بەشەدا، بەندەش، وەک پەیامنێری ڕۆژنامەی «هەولێر» و کادیری حیزب و پێشمەرگەی سەردەم، خەڵات کرام.
یادەوەرییەک بۆ داهاتوو
یادی ٢٥ی ئەیلوول لە هۆڵەندا تەنها یادکردنەوەی ڕووداوێکی سیاسی نەبوو؛ بەڵکو دەرفەتێک بوو بۆ بیرکردنەوە لە مێژوو، ناسنامە، مافی دیاریکردنی چارەنووس و داهاتووی گەلی کورد.
ڕیفراندۆمەکەی ٢٥ی ئەیلولی ٢٠١٧، هەرچەندە ئەنجامە سیاسییەکەی نەبووە هۆی دامەزراندنی دەوڵەتێکی سەربەخۆ، بەڵام وەک ڕووداوێکی گرنگ لە مێژووی نوێی کورددا ماوەتەوە؛ ڕۆژێک کە ملیۆنان کورد بەشدارییان تێدا کرد و دەنگیان لەسەر داهاتووی سیاسیی خۆیان دەربڕی.
بۆ زۆرێک لە کوردان، ئەو دەنگە هێشتا لە یادەوەرییەکاندا زیندووە؛ دەنگێک کە بە مێژووەوە گرێ دراوە و هیوا بە داهاتوویەک دەبەخشێت کە تێیدا مافی گەلەکان بۆ دیاریکردنی چارەنووسی خۆیان لە چوارچێوەی یاسا و پرەنسیپە نێودەوڵەتییەکاندا ڕێزی لێ بگیرێت.