حەیدەر مەنتک
لە جیهانێکدا کە زۆر جار دەنگی خۆش، لە ناو ژاوەژاوی کێشمەکێشدا ون دەبێت، پێویستیی کۆمەڵگە بە گەڕانەوە بۆ بەها مرۆییە ڕەسەنەکان، لە هەموو کاتێک زیاترە؛ خۆشەویستی تەنها دەربڕینێکی ڕۆمانسی یان هەستێکی تێپەڕ نییە، بەڵکو وەکو هەوێنی بنیادنانی پەیوەندییەکی سەنگین و سەقامگیریی دەروونیی تاکەکان کار دەکات.
کاتێک ئینسان لە ناخی خۆیدا تۆمی سۆز و خەمخۆری دەچێنێت، ئەو تیشکە تەنها لە سنووری دڵیدا نامێنێتەوە، بەڵکو دەپەڕێتەوە بۆ دەوروبەری و ژینگەیەک لە لێبوردهیی، ئاشتی، و تێگەیشتنی یەکتر دروست دەکات.
مرۆڤایەتی لە بنەڕەتدا پێویستی بە هەستکردن بە ئارامی و ئەمان هەیە، ئەمەش بەبێ بنەمایەکی بەهێزی لێبوردهیی و متمانە و خۆشەویستی نێوان تاکەکان نایەتە دی. بڵاوکردنەوەی ئەم هەستە پاکە، هێزێکی شاراوەی هەیە کە دەتوانێت بەربەستە دەروونی و کۆمەڵایەتییەکان هەڵوەشێنێتەوە و برینە قووڵەکان سارێژ بکات.
کاتێک بە دیدێکی پر لە میهرەبانییەوە لە دەوروبەرمان دەڕوانین، جیهان لە شوێنێکی سارد و پڕ لە ڕکابەرییەوە دەبێتە ماڵێکی گەرم بۆ هەمووان. لەسەر ئەم بنەمایەش، ئاوڕدانەوە لە بەهای خۆشەویستی دەبێتە پێویستییەکی ڕۆژانە و ئەرکێکی ئەخلاقی بۆ هەر کەسێک کە دەستپێشخەری لە چاکەکاریی دەکات.
بێگومان وشەی خۆشەویستی خۆی لەخۆیدا ئارام بەخشە، سۆزێکە پاکی لێدەتکێ، هەستێکە جیاوازە لەههندێ کردار.. بەخۆشەویستی نێوان تاکەکان، کۆمەڵگا هەنگاوی دروست دەنێ، هەوڵبدە خۆشەویستی بکە بنەمای پێکەوە ژیان، تۆی تاک، هەوڵەکان بۆ جوانکردنی ئەم و ئەو بێت، سەرئەنجام خۆشەویستیەک لەدایک دەبێت، ئەنجامەکەی، دڵخۆشکەرییەکەی، ڕێزگرتنەکەی و، هاوکارییەکەی بۆ زۆرترین تاکی کۆمەڵگا دەبێت.
ئەوانەی لەناو خەڵک پێگەیەکی زۆریان هەیە مەرج نیە دەوڵەمەندو بەرپرس بن، بەڵکو زۆر جار کەسێکی سادەی نێو کۆمەڵگان، کەچی باوەڕپێکراو خاوەنڕا و کەسایەتییەکی زۆر جوانن. بۆیە هەتا دەکرێ خۆشەویستی پەخشبکەن و ببنە مایەی ڕازیکردنی دەوروبەرتان، ڕێز لە ڕای یەکتر بگرن و بە خۆشەویستییەوە سەیری یەکتر بکەن.
با خۆشەویستی بدەینەوە
