شێرکۆ حەبیب
هەندێک ڕووداوی مێژوویی تەنها بە ساڵ و بەروار دەناسرێن، بەڵام هەندێکی تر لە دڵی گەلێکدا دەژین و دەبنە بەشێک لە بیرەوەری و ناسنامەی ئەو گەلە. شۆڕشی ئەیلوول یەکێکە لەو ڕووداوانەی کە لە مێژووی کورددا تەنها ناوی شۆڕشێک نییە، بەڵکوو دەنگی گەلێکە کە ویستی بژێت بە ئازادی و بە کرامەت.
لە ١١ی ئەیلولی ١٩٦١ەوە، پەیامێک بە دەنگێکی بەرز و ئاشکرا راگەیاند کەوا گەلێک کە مافەکانی پشتگوێ دەخرێن، نابێت بێدەنگ بمێنێتەوە.
میللەتێک شۆڕشی کرد
ئەیلوول تەنها لە شاخەکان نەبوو، لە پشت هەر پێشمەرگەیەک، خێزانێک بوونی هەبوو لە پشت هەر فەرماندەیەک، کۆمەڵگەیەک هەبوو، و لە پشت هەر هەنگاوێکی شۆڕشگێڕانە، هیوای گەلێک هەبوو.
پیاوان و ئافرەتان، گوندنشین و شارنشین، خەڵکی ئاسایی و کەسانی خوێندەوار، هەر یەک بە شێوەی خۆی بەشێک بوون لەو شۆڕشە.
بۆیە نابێت ئەیلوول تەنها بە ناوی ئەو کەسانە بناسرێت کە چەکیان هەڵگرت کە جێگای شانازین، بەڵام مێژووی ئەیلوول مێژووی ئەو گەلەشە کە پشتگیریی ئەو شۆڕشەی کرد و لە قۆناغە سەختەکاندا لەگەڵی مایەوە، ئەوەی ئەیلوول بەهێز کرد، تەنها چەک نەبوو، بەڵکو باوەڕی گەل بوو بە ماف و ئازادی.
ئازادی، ئامانجی خەبات
لە هەموو مێژووی ئەیلوولدا، وشەیەک هەیە کە نابێت لەبیر بکرێت: ئازادی.
ئازادی بۆ گەلێک تەنها وشەیەکی سیاسی نییە. ئازادی واتە مرۆڤ بتوانێت بە زمانی خۆی قسە بکات، بە ناسنامەی خۆی بژی، بە مافەکانی بناسرێت و بۆ داهاتووی خۆی هیوای هەبێت، لەو ڕوانگەیەوە، خەباتی ئەیلوول خەباتێک بوو بۆ ئەوەی کورد بتوانێت بە شێوەیەکی ئازاد و بە کرامەت لە نیشتیمان و زێدی خۆیدا بە ئازادی و سەربەست بژی، ئەم ئامانجە وەنەبێت کە تەنها بۆ یەک نەوە بووبێت. ئەوە داواکارییەکی مرۆییە کە لە هەموو سەردەمێکدا بەهاکەی هەیە.
ئاشتی، ئەو ئامانجەی لە پشت شۆڕشدا بوو
لەوانەیە لە یەکەم سەیرکردندا، کۆکردنەوەی «شۆڕش» و «ئاشتی» لە یەک ناونیشاندا نامۆ بێت. بەڵام ئەگەر بە وردی لە مانای خەباتی شۆڕشی ئەیلوول بڕوانین، ئەو دوو وشەیە دژ بە یەک نین، ئەو گەلەی بۆ ماف و ئازادی خەبات دەکات، لە بنەڕەتدا بۆ ژیانێکی ئارامتر و دادپەروەرانەتر خەبات دەکات.
ئامانجی خەبات نابێت بەردەوامکردنی شەڕ بێت؛ ئامانج دەبێت گەیشتن بەو ڕۆژە بێت کە شەڕ چیتر چارەسەری کێشەکان ناکات.
ئەیلوول لەو ڕوانگەیەوە تەنها مێژووی بەرگری نییە، مێژووی هەوڵدانە بۆ گەیشتن بە ژیانێک کە تێیدا ماف و ئاشتی لەگەڵ یەکدا بژین.
ئەیلوول و کەرامەتی مرۆڤ
لە پشت هەموو داواکارییە سیاسییەکاندا، مرۆڤ هەیە، ئەو مرۆڤەی کە دەیەوێت بە ئارامی لە شوێنەکەی بژی، منداڵەکەی بخوێنێت، بە زمانی خۆی قسە بکات و بە ناسنامەکەی شانازی بکات، ئەگەر ئەم خاڵە لەبەرچاو بگرین، دەبینین کە ئەیلوول تەنها پرسیارێکی سیاسی نەبوو، پرسیارێکی مرۆییش بوو، بۆیە یادکردنەوەی ئەیلوول دەبێت لەگەڵ یادکردنەوەی ئەو مرۆڤانە بێت کە ژیانیان لە پێناوی باوەڕێک بە ئازادی و دادپەروەریدا خستە مەترسییەوە.
ئەوەی ئەیلوول بۆ نەوەی ئێمە جێی هێشتووە
ئەمڕۆ کە یادی ٦٥ ساڵیادی شۆڕشی ئەیلوول دەکەینەوە، ئەرکی ئێمە تەنها ئەوە نییە کە شانازی بە ڕابردوو بکەین، بەڵکو ئەیلوول پرسیارێکیشمان لێ دەکات:ئایا ئێمە بە هەمان پێوانەی ئەو نەوەیە بەرپرسیارین لە پاراستنی ئازادی و ئاشتی؟
نەوەی ئەمڕۆ دەبێت تێبگات کە پاراستنی مێراتی شۆڕش تەنها بە دووبارەکردنەوەی وشەکان ناکرێت. بە خوێندن، بە ئاگایی، بە کارکردن، بە پاراستنی کۆمەڵگە و بە دروستکردنی ژیانێکی باشتر بۆ نەوەی داهاتوو دەکرێت. چونکە ئەو انەی لە ئەیلوولدا خەباتیان کرد، تەنها بۆ خۆیان خەباتیان نەکرد بەڵکو بۆ ئەو نەوەیەش خەباتیان کرد کە هێشتا نەهاتبوو.
ئەیلوول، پەیامێک بۆ ئایندە
ئەیلوول لە مێژووی کورددا ئەوەمان بۆ دەسەلمێنێت کەوا گەلێک کە باوەڕی بە مافەکانی هەیە، دەتوانێت لە بەرامبەر سەختییەکاندا بوەستێت، بەڵام ئەو پەیامە نابێت تەنها پەیامی بەرگری بێت، بەڵکو دەبێت پەیامی ئاشتی و پێکەوەژیانیش بێت، چونکە ئازادی بەبێ ئاشتی ناتوانێت بەردەوام بێت، و ئاشتی بەبێ دادپەروەری و ڕێزگرتن لە مافەکانیش بناغەیەکی بەهێز نابێت، لەبەر ئەوە، ئەیلوول بۆ ئێمە تەنها ڕابردوو نییە. ئەوە بیرەوەریی گەلێکە کە خەباتی کرد بۆ ئەوەی بە ئازادی بژی، و لە هەمان کاتدا هیوای ژیانێکی ئارام و ئاشتیخواز هەڵگرت.
شۆڕشی ئەیلوول، شۆڕشی گەلێکی خەباتکار بوو، گەلێک کە بۆ ئازادی و مافەکانی خەباتی کرد، بەڵام لە کۆتاییدا ئامانجی مرۆییی ئەو خەباتە ژیانێکی ئازاد، سەربەخۆ و ئاشتیخواز بوو.
و ئەوەی ئەیلوول لە مێژوودا بۆ ئێمە جێی هێشتووە، تەنها چیرۆکی ڕابردوو نییە، پەیامێکە بۆ سبەی کوردستان: ئازادی بە ئیرادە دەپارێزرێت، و ئاشتی بە دادپەروەری بەردەوام دەبێت.