هه‌ولێر به خاڵێك له به‌غداوه به‌ره‌و هه‌رێمی كوردستان گه‌ڕایه‌وە
له گه‌ڕی 21ـه‌می خولی نایابی تۆپی پێی عێراق، یانه‌ی هه‌ولێر به خاڵێك له به‌غدا گه‌ڕایه‌وه و یانه‌ی زاخۆش سنوورێكی بۆ ئه‌نجامه خراپه‌كان دانا و هه‌شته‌مین سه‌ركه‌وتنی له‌م وه‌رزه تۆمار كرد.
یانه‌ی هه‌ولێر له ده‌ره‌وه‌ی یاریگه‌ی خۆی بووه میوانی یانه‌ی ئه‌مانه‌ی به‌غدا، له خوله‌كی 6ـی ده‌ستپێكی یارییه‌كه، جه‌بار كه‌ریم هێرشبه‌ری یانه‌ی ئه‌مانه گۆڵی پێشكه‌وتنی له دژی هه‌ولێر تۆمار كرد.
خۆشییه‌كانی ئه‌مانه‌ی به‌غدا ته‌نیا 2 خوله‌كی خایاند، كاتێك شێركۆ كه‌ریم به لێدانی پێناڵتی ئه‌نجامه‌كه‌ی یه‌كسان كرده‌وه كه ئه‌مه شه‌شه‌مین گۆڵی ئه‌و ئه‌ستێره كورده بوو له‌م وه‌رزه‌ی خولی نایابی عێراق.
دوای ئه‌و گۆڵه، شوان مامۆ كاپتنی یانه‌ی هه‌ولێر لێدانێكی مووشه‌كی ئاراسته‌ی سه‌رهه‌نگ موحسینی گۆڵپارێزی یانه‌ی ئه‌مانه كرد، به‌ڵام تۆپه‌كه به‌ر ستوون كه‌وت و نیوه‌ی یه‌كه‌م به گۆڵێك بۆ هه‌رلایه‌كیان كۆتایی هات.
له نیوه‌ی دووه‌می یارییه‌كه، نزار مه‌حرووس راهێنه‌ری یانه‌ی هه‌ولێر سه‌رجه‌م كارته‌كانی تاقی كرده‌وه، سه‌ره‌ڕای فشارێكی زۆر بۆ سه‌ر گۆڵی یانه‌ی ئه‌مانه‌ی به‌غدا، به‌ڵام نه‌یانتوانی به‌ربه‌ستی یه‌كسانبوون بكشێنن و یارییه‌كه به گۆڵێك بۆ هه‌ر لایه‌كیان كۆتایی هات.
نزار مه‌حرووس هۆكاری یه‌كسانبوونه‌كه ئاشكرا ده‌كات
نزار مه‌حرووس راهێنه‌ری یانه‌ی هه‌ولێر له دوای یارییه‌كه رایگه‌یاند كه ئه‌و یاریگه‌یه شیاوی یاریكردن نییه، گوتیشی: یاریزانه‌كانمان نه‌یانتوانی له‌سه‌ر ئه‌م یاریگه خراپه ئاستی راسته‌قینه‌ی خۆیان پێشكه‌ش بكه‌ن، له‌گه‌ڵ ئه‌وه‌شدا ئه‌نجامه‌كه تاڕاده‌یه‌ك دادپه‌روه‌رانه بوو، خاڵێكیش كه‌م نییه.
یانه‌ی هه‌ولێر رۆژی یه‌كشه‌ممه‌ی داهاتوو له گه‌ڕی 22ـه‌می خولی نایابی عێراق له نێو یاریگه‌ی فه‌ره‌نسۆ هه‌ریری میوانداریی یانه‌ی شوڕته‌ی پێشه‌نگی خوله‌كه ده‌كات و یارییه‌كه‌ش له كاتژمێر 06:00ـی ئێواره به‌ڕێوه ده‌چێت.
یانه‌ی هه‌ولێر له‌ژێر سه‌رپه‌رشتی نزار مه‌حرووس له كۆی 7 یاری، 5 بردنه‌وه و 2 به‌رامبه‌ربوونی هه‌یه و به كۆكردنه‌وه‌ی 25 خاڵ به‌شێوه‌یه‌كی كاتی له خانه‌ی ده‌یه‌می ریزبه‌ندی ماوه‌ته‌وه.
زاخۆ هه‌شته‌مین بردنه‌وه‌ی تۆمار كرد
زاخۆ دوای به‌رامبه‌ربوونێك و دۆڕانێک لە خولی نایابی عێراق بە سەرکەوتن شاد بووە و له ده‌ره‌وه‌ی یاریگه‌ی خۆی شكستی به یانه‌ی کەرخ هێنا.
یانه‌ی زاخۆ لە گەڕی بیست و یەکەمینی خولی نایابی عێراق لە بەغدا بووە میوانی یانەی کەرخ.
زاخۆ لە دوو گەڕی رابردوو ئەنجامەکانی خراپ بوون، بەرامبەر نەفتی میسان یەکسان بوو و لە دێربی کوردستانیش بەرامبەر نەورۆزی سلێمانی دۆڕا.
زاخۆ دەرفەتی لەبەردەم بوو بۆ ئەوەی ئەم یارییە بباتەوە و بە سەرکەوتنەکان شاد ببێتەوە، بەتایبەت لە کاتێکدا رکابەرەکەی لە دۆخێکی خراپە و لە خانەی دابەزین بۆ خولی پلەیەک دەبینرێت، هەرچەندە ئەم یانەیەش هەوڵی تێپەڕاندنی ئەم قۆناغە دەدات و نایەوێت وەرزی داهاتوو لە خولی پلەیەک بێت.
سەرەڕای هەوڵەکانی هەردوولا، بەڵام نیوه‌ی یه‌كه‌می یاریی كه‌رخ و زاخۆ بە یەکسانبوون و بەبێ گۆڵ کۆتایی هات.
لە نیوەی دووەم زاخۆ باشتر دەرکەوت و ئەنجامی یارییەکەی گۆڕی و بە گۆڵی یەکەم پێشکەوت، فرانک سیدریکی کامیرۆنی لە دەستپێکی ئەم نیوەیە گۆڵی پێشکەوتنی زاخۆی کرد.
راهێنەری زاخۆ گۆڕانکاری کرد و لە خولەکی 59 ڤیتۆری بەڕازیلی شوێنی عیماد موحسینی گرتەوە، دواتر لە خولەکی 70 كه‌رخ هەڕەشەیەکی پڕ مەترسی كرده سه‌ر گۆڵی زاخۆ، بەڵام عیماد عیسای گۆڵپارێز بەرپەرچی دایەوە.
لە خولەکی 78 کەرخ گۆڵی کرد و یاریزانان ئاهەنگیان گێڕا بەڵام گۆڵەکە دروست نەبوو بە ئۆفساید هەژمار کرا.
کەرخ هەموو هەوڵێکیدا بۆ راستکردنەوەی ئەنجامی یارییەکە و فشاری لەسەر گۆڵی میوانەکەی دروست کرد، بەڵام کوڕانی خابور بەرپەرچیان دانەوە.
دواجار یارییەکە کۆتایی هات و زاخۆ بە گۆڵێکی بێبەرامبەر یارییەکەی لە کەرخ بردەوە و هەشتەمین سەرکەوتنی لەم وەرزە تۆمار کرد.