دلڤین خەلەف *
دەمێ دیرۆکا مللەتێ کورد دهێتە شۆپاندن یا دیارە کو پارچەبوونا کوردستانێ ل سەر دەستێ رژێمێن داگیرکەر و مللەتێن بێ وژدان یێن هاویردۆرێ وێ نە تەقەزایەکا بێ بنەما بوویە و نەکەڤتنەکا بێ ئەگەر و ژنیشکەکێڤە بوویە و هەروەسا دەربەدەرکرنا ئەڤی مللەتێ خۆراگر نە ژ ئەگەرێ پاشڤەمایی و نەزانین و بێدەستهەلاتیەکا رەوا بوویە هەتا کو ل درێژیا دیرۆکێ مایە دیل و بێ خودان و کەڤتیە ژێردەستێ گەلێن زۆردار و هاتیە تەپەسەرکرن، لێ وەکو دیار هەردەم هەولێن قرکرنا وی ب هەر جۆرەکی و هەموو رەنگا هاتیە دان و رێک پێ نەهاتیە دان بەر خۆ ببینە و سەرێ خۆ راکە ژبەر زۆرداریا لێ دهێتە کرن، ژبەر کو هەر ژبنەرەت پیلانێن دارێشتی و رێککەڤتنێن پێشوەخت ژلایێ داگیرکەران ڤە بۆ ئەڤێ چەندێ هاتینە ل دارخستن و ئارمانجا وان ژ ئەڤێ چەندێ ژی ترسا هەبوونا وەلاتەکی ئێکگرتی و ئێکرێزیەکا ب هێز یا مللەتەکی خودان شیان و گێرانا دەستهەلاتەکا ژێهاتی و پڕ ژ سەروەری یا گەلێ کورد بوویە ل دەڤەرێ.
بێگومان بەردەوامیا پیلانێن دوژمنکاری ل سەر مللەتێ کورد ب مخابنی ڤە کارتێکرنەکا نەرێنی هەبوویە و ئەڤ چەندە ژی بوویە ئەگەرێ ژێک دابریانەکا مەزن د ناڤبەرا مللەتی دا و ناچارکریە سیاسەتا زۆرداریێ قەبول بکەت ژ ئەگەرێ بێدەستهەلاتیێ و دیسان پێخەمەت پاراستنا ناسنامەیا خۆ یا نەتەوەیی و وندانەبوونا ڕهـ و ریشال خۆ یێن کەڤنار و هەبوونا تایبەتمەندیا خۆ یا جڤاکی، لێ سەرەرایی ئەڤێ چەندێ ژی بەرخۆدانا گەلێ کورد یا بەردەوام بوویە و شۆرەش و سەرهلدانێن خۆراگریێ ل سەرانسەری خاکێ کوردستانێ بێ دەنگ نەبووینە و مللەتێ مە بێ راوەستیان ل قادا خەباتێ رۆلەکی گرنگ گێرایە و سەرکەڤتنێن بەرچاڤ ب دەستخۆڤەئیناینە و ژ ئەنجامێ وێ بەرخۆدانا پیرۆز پارچەکی پیرۆز یێ ئاخا وەلاتی رزگار بوویە و گەلێ کوردستانێ ب سەرفەرازیی ب مافێ خۆ شاد بوویە و لسەر ئاخا باب و کالێ خۆ هەست ب ژیانەکا ئازاد کریە و سەرکردایەتیا ئەڤی پارچێ ئازاد ب هێز پالپشتی ل دۆزا رەوا یا گەلێ کورد ل هەر جهەکی کریە و بوویە پشت وپنا ژ بۆ مللەتێ کورد بگشتی و هەولێن ئازادیەکا سەرانسەری ژ بۆ تەڤایا گەلێ کورد ل هەرچار پارچا کریە و پێخەمەت گەهشتنا ئارمانجا سەرەکی د بەردوامن ل ژێر سیاسەتا سەرکەڤتی یا سەرۆک و رێبەرێ کوردان سەرۆ بارزانی و بلەز پێنگاڤێن باش ژ بۆ گەهشتنا ماڤێ گەلێ کوردا دهێنە هاڤێتن.
دیسان د ئەڤێ چەندێ دا ژی رۆلێ ئافرەتا کوردستانی یا خۆراگر ناهێتە ژبیرکرن و هەموو دەما و دهەر پێنگاڤەکا شۆرەش و بەرخۆدانا مللەتێ کورد دا گرنگ دهێتە نرخاندن ژبەر کو ئەو هەردەم هلگرا ئالایێ خەبات و خۆراگریێ بوویە و پشکا شێری ژ زەحمەتیێ بەهرا وێ بوویە و بێدودلی ئەرکێ خۆ یێ نشتینانپەروەری جی بجیکریە و پشکداری د ئازادیا وەلاتێ خۆ دا کریە و قوربانی داینە و بوویە شانازیەکا مەزن ژ بۆ پێشکەڤتن وسەرڤەرازیا وەلاتێ خۆ و ئالایێ کوردستانا پیرۆز دەست ب دەستێ کورێن گەلێ خۆ بلند راکریە و ئەرکێ خۆ یێ نەتەوەیی ب باشترین شێواز ب جیهئینایە و بوویە سنبلەک ژ بۆ ئازادیا گەلێ خۆ. هەر ئاڤەدان بێ کوردستان.
* ئەنداما سکرتاریەتا ئێکەتیا ئافرەتێن کوردستانێ