ئیتالیا دەستی کرد بە ئۆڵۆمپیادی زستانەی میلانۆ و کۆرتینا

شۆڕش عەزیز سورمێ
ئیتالیا ئێوارەی هەینی دەستی کرد بە رێکخستنی رێوڕەسمی کردنەوەی ئۆڵۆمپیادی زستانەی میلان و کۆرتینا ٢٠٢٦ لە یاریگای ئایکۆنی سان سیرۆی میلانۆ.
لە مەراسیمەکەدا کە سێ کاتژمێری خایاند، نمایشی سەرنجڕاکێشی کۆمەڵێک ئەستێرەی مۆسیقای نێودەوڵەتی پێشکەش کرا، لەوانە گۆرانیبێژی ئەمریکی ماریا کاری و تێنۆری بەناوبانگی جیهانی ئیتاڵی ئەندریا بۆسێلی و ئەستێرەی پۆپی ئیتاڵی خاوەنی خەڵاتی گۆڵدن گڵۆب لۆرا پاوسینی.
لە چالاکییەکەدا نزیکەی ٥٠ سەرکردەی جیهان بەشدارییان کرد، لەوانە سەرۆکی لیژنە نێودەوڵەتییەکەی ئۆڵۆمپیک کیرستی کۆڤێنتری، ئەنتۆنیۆ گۆتێرێس سکرتێری گشتی نەتەوە یەکگرتووەکان، جێگری سەرۆکی ئەمریکا جەی دی ڤانس و مارکۆ ڕوبیۆ وەزیری دەرەوەی ئیتالیا، هەروەها سێرجیۆ ماتارێلا سەرۆکی ئیتالیا و جۆرجیا مێلۆنی سەرۆکوەزیرانی ئیتالیا.
لە ژێر ڕۆشنایی ئەم ڕووداوە جیهانییەدا، ڕێوشوێنی ئەمنی بەرزتر لە میلانۆ جێبەجێ کرا، بەتایبەتی دوای ئاژاوەگێڕییەکانی هەفتەی ڕابردوو لە شاری تۆرین لە کاتی ناڕەزایەتییەکدا دژی داخستنی ناوەندێکی کۆمەڵایەتی چەپ، هەروەها مشتومڕی بەردەوام لەسەر بوونی بریکارەکانی کۆچبەری و گومرگی ئەمریکا لە ئیتالیا لە کاتی یارییەکاندا.
بۆ یەکەم جار لە مێژووی ئۆڵۆمپیادی زستانەدا دوو شار لە یەک کاتدا میوانداری یارییەکان دەکەن، پێشبڕکێکان لە سێ ناوچەی سەرەکیدا بڵاوبوونەتەوە کە بریتین لە لۆمباردی، ڤێنێتۆ و ترێنتینۆ-ئاڵتۆ ئادیج.
شانبەشانی چالاکییە سەرەکییەکە لە میلانۆ، ڕۆژی هەینی ئاهەنگ و ڕووداوە وەرزشییەکانی هاوکات لە پرێدازۆ، لیڤینۆ و کۆرتینا دی ئەمپێزۆ بەڕێوە چوو، ئەمەش دەستپێکردنی یارییەکان بوو کە لە ٦ تا ٢٢ی شوبات بەردەوام دەبێت.
هەروەها لە هەمان ڕۆژدا دوو کۆفەی ئۆڵۆمپی کە لە دیزاینەکانی لیۆناردۆ داڤینچی ئیلهام وەرگیراون، ڕووناک کرانەوە، یەکێکیان لە ژێر کەوانەی ئاشتی لە میلانۆ و ئەوی دیکەیان لە گۆڕەپانی دی بۆنا لە کۆرتینا، لە نمایشێکی هێماداری سەرنجڕاکێشدا.
هەرچەندە ئاهەنگی کردنەوەی یارییەکە ڕۆژی هەینی بەڕێوە چوو، بەڵام یارییەکانی ئۆڵۆمپیاد بە فەرمی لە ڕۆژی چوارشەممە دەستی پێ کرد بە دەستپێکردنی پێشبڕکێی کرلینگی دووانە تێکەڵەکان لە شاری کۆرتینا.
هەروەها پێشبڕکێی هۆکی سەر سەهۆڵی ئافرەتان ڕۆژی پێنجشەممە لە شاری میلانۆ دەستی پێ کرد و تیایدا هەڵبژاردەی میوانداری ئیتالیا سەرکەوتنێکی مێژوویی بەسەر فەرەنسا بەدەست هێنا و یەکەم سەرکەوتنی لە ئۆڵۆمپیاددا لەم وەرزشەدا مسۆگەر کرد.
سەدان خوێندکار لە شاری میلانۆی پایتەختی ئیتالیا خۆپیشاندانیان کرد بۆ دەربڕینی ناڕەزایەتی بەرامبەر بە بەشداریکردنی ئیسرائیل لە ئۆڵۆمپیادی زستانەدا کە شارەکە لە ٦ تا ٢٢ی شوبات میوانداری دەکات.
سەدان خوێندکاری خۆپیشاندەر ڕۆژی پێنجشەممە ڕژانە سەر شەقامەکانی میلانۆ کە هاوکات بوو لەگەڵ ڕێڕەوی مەشخەڵی ئۆڵۆمپیاد.
مەشخەڵی ئۆڵۆمپی لە میلانۆ-کۆرتینا بە ناوەندی شارەکەدا تێدەپەڕی و، لە خاڵێکدا ڕووبەڕووی ناڕەزایەتی بووەوە.
سەدان خوێندکار لە بەردەم کەمپی زانکۆی میلانۆ کۆ بوونەوە و ئاڵا و لافیتەی فەلەستینیان هەڵدا، لە کاتێکدا مەشخەڵەکە بە ڤیا فرانسیسکۆ سفۆرزادا تێدەپەڕی.
خۆپیشاندەران دژایەتیی خۆیان بۆ بەشداریکردنی ئیسرائیل لە ئۆڵۆمپیادەکان دەربڕی و بە ئاماژەدان بە جینۆسایدە گوماناوییەکەی ئیسرائیل لە کەرتی غەززە.