ئامادەکرن: کاڤین نەبیل
ژ گرنگترین کارێن ڕاگەهاندنێ ئەڤرۆ ئەوە کو ئەم تیرێژێ بێخینە سەر دەستکەفتێن ئافرەتێ؛ ئافرەتا ئێزدی ب ڕێکا ڕاگەهاندنێ شیایە دەنگێ خۆ بلند بکەت و چیرۆکێن خۆ، وان نەهامەتی و دەردەسەریێن ب سەرێ وان هاتین، بگەهینتە هەمی جیهانێ.
دلخواز خدر حاجی بۆ هێلین میدیا:
د دەهـ ساڵێن بۆریدا، ڕاگەهاندنێ گوهۆڕینەکا ڕادیکاڵ ب خۆڤە دیتییە و ژ چارچۆڤەکێ سنووردار و تەقلیدی بەرەڤ قۆناغەکا دیجیتاڵ و بلەز پێنگاڤ هاڤێتییە. جوداهیا سەرەکی د ناڤبەرا ڕاگەهاندنا بەری دەهـ سالان و یا نۆکەدا، د ئازادیا گەهشتنێ و بەلاڤکرنێ دایە؛ چونکی سۆشیال میدیایێ ڕێ دا کو هەمی دەنگ بێی سانسۆر بگەهنە جیهانێ و وەلاتی ب خۆ ببیتە پشکەک ژ دروستکرنا زانیارییان، کو ئەڤ چەندە بوویە ئەگەر دەستهەلاتا میدیایێ ژ دەستێ کەسانێن دیارکری بکەڤیتە دەستێ جڤاکی ب گشتی.
د ڤێ گوهۆڕینێ دا، ئافرەتێ ڕۆلەکێ کاریگەر د پێشئێخستنا ڕاگەهاندنێ دا گێڕایە و بزاڤێن وێ بووینە ئەگەر کو ناڤەرۆکا میدیایێ دەولەمەندتر لێ بهێت. ئافرەتێ نەک بتنێ وەک بێژەر کار کرییە، بەلکو وەک کەسەکا خودان بڕیار، وێنەگر و پەیامنێرا مەیدانی شیایە بابەتێن مرۆڤایەتی و جڤاکی یێن هەستیار بکەتە ئەولەویەتا کارێ میدیایی. ڤێ پشکداریا کارا، هێزەکا نوی دا پەیاما ڕاگەهاندنێ و ڕاستیا ژیانا خێزانی و ئاریشێن جڤاکی ب شێوەیەکێ زەلالتر بەرچاڤ کرن.
ژ لایەکێ دی ڤە، ڕاگەهاندنێ تا ڕادەیەکی شیایە وێنەیێ ڕاستەقینەیێ ئافرەتا مە بگەهینیتە جیهانێ و وێ وەک نموونەیەکا خودان ئیرادە و تێکۆشەر بدەتە ناساندن. ب ڕێکا ڤان هەوڵان، جیهان تێگەهشت کو ئافرەت ل ڤێرە نەک بتنێ قوربانییە، بەلکو ئەو پارێزەر، مامۆستا و هەڤپشکەکا کارایە د ئاڤاکرنا پاشەرۆژێ دا. لەوا، گەلەک یا گرنگە کو ڕاگەهاندن بەردەوام بیت ل سەر دیارکرنا سەرکەفتنێن ئافرەتێ، چونکی ئەڤ چەندە دبیتە پالپشتەک بۆ شکاندنا بەربەستێن جڤاکی و گوهۆڕینا وان هزرێن کو شیانێن ئافرەتێ کێم دبینن. دەرئەنجام، ڕاگەهاندن بێی دەنگ و بزاڤێن ئافرەتێ، میدیایەکا ناتەمامە و نەشێت ب ڕاستگۆیی بەحسێ هەمی ڕەنگ و لایەنێن جڤاکی بکەت.
دلڤین حاجی ملکو بۆ هێلین میدیا:
ئافرەتا ئێزدی ب ڕێکا ڕاگەهاندنێ شییا دەنگێ خوە بلند بکەت و چیرۆکێن خۆ، وان نەهامەتی و دەردەسەریێن ب سەرێ وان هاتین و کولتوورێ ئێزدی بگەهینیتە هەموو جیهانێ؛ چ ب ڕێیا تەلەڤزیۆن، ڕادیۆ، ڕۆژنامان یان میدیایا جڤاکی بیت.
ئافرەتێ هەردەم ڕۆلەکێ مەزن گێڕایە ژ بۆ پشتەڤانیێ ل ئافرەتەکا دی. ئافرەتێن ڕۆژنامەڤان و کارمەندێن میدیایێ یێن ئێزدی بوونە نموونە بۆ جڤاکێ خۆ و وان دیار کر کو ئافرەت دشێت ببیتە دەنگەکێ بهێز، هەروەسا بووینە پشتەڤان بۆ هندەک کچێن نوی دا کو بگەهنە خەونێن خۆ.
خرابیێن ڕاگەهاندنێ ژی هەنە، بەلێ وێرەکیا ئافرەتا ئێزدی بەردەوامە. سەرەڕای وێ پالپشتیا کێم ژ لایێ کۆمەڵگەهێ ڤە و مەترسیێن ل سەر ژیانێ، ب ڕێکا ڕاگەهاندنێ ئافرەت دشێت کولتوورێ ئێزدی، زمان و داب و نەریتان بپارێزیت و بگەهینیتە نڤشێ نوی. ئافرەتا ئێزدی ئەڤرۆ گەلەکا ب هێزە و دەنگێ وێ دگەهیتە هەمی جیهانێ.
سۆزان کەریم جلعان بۆ هێلین میدیا:
ژ گرنگترین کارێن ڕاگەهاندنێ ئەڤرۆ ئەوە کو ئەم تیرێژێ بێخینە سەر دەستکەفتێن ئافرەتێ، یێن کو ب هەموو شیانێن خۆ بجهـ ئیناین. ڕاگەهاندن تنێ ئەو نینە کو نووچەیەکێ بگەهینی، بەلکو ئەوە تو بۆچوونا گشتی دروست بکەی. دەمێ ڕاگەهاندن چیرۆکێن سەرکەفتنێ، ب تایبەت یێن ئافرەتێ د هەموو بیاڤان دا دیار دکەت (چ بیاڤێ هۆنەری بیت یان سیاسی یان ژی ڕەوشەنبیری… هتد)، وێ دیتنا ل سەر ئافرەتێ یا کو بەری چەندین ساڵان هەبووی دشکینیت، ب تایبەت د چاڤێ جڤاکەکێ پاشکەفتی دا.
دیارکرنا دەستکەفتێن ئافرەتێ نامەیەکێ دگەهینیت کو ئەڤ هەموو دەستکەفتە ئەنجامێ زەحمەتیەکێ، ئیرادەکا بهێز و زانینەکا جوان یا ئافرەتێ نە. ئەڤە ژی وەسا دکەت کو کچێن د ناڤ جڤاکیدا، یێن د تەمەنەکێ بچووک دا، چاڤ ل ڤان ئافرەتێن سەرکەفتی بکەن و باوەریا وان ب خۆ بهێزتر بیت. دەمێ مە شیابیت دەستکەفتێن ئافرەتێ د ڕاگەهاندنێ دا دیار بکەین، وی دەمی مە شیایە دەرگەهەکێ ژ بۆ کچ و ئافرەتێن دیتر ڤەکەین یێن کو خودان ئیرادە و هێزن.