لازمە شێخ یوسف
هەلمەتا ١٦ ڕۆژی یا بەرەنگاربوونا توندوتیژییا دژی ئافرەتان، ئەوا ژ ٢٥ێ نۆڤەمبەرا هەر سالەکێ دەستپێدکەت و ل ١٠ێ دیسەمبەرێ ب دووماهیک دهێت؛ ڕێکەفتا دووماهیک هاتنا وێ هەڤدەمە دگەل ڕۆژا جیهانی یا مافێ ئافرەتان.
د ئەڤێ ڕۆژێ دا گەلەک نامەیێن جوان دهێنە نڤیسین، ب تایبەت ژلایێ وان کەسان ڤە یێن د بوارێ مافێ ئافرەتێ دا کار دکەن و یێن باوەری ب یەکسانیێ هەی، ژبۆ دانوستاندنێ ل دۆر ماف و هەبوون و پاشەڕۆژا ئافرەتێ، و ژ وان داخوازیێن تایبەت یێن ڕزگاربوویێن دەستێ داعش و چەوانیا کارکرنێ ژبۆ پاراستنا مافێ وان، و کارکرن ل سەر چارەسەرکرنا کێشەیێن ڕووبەڕووی ئافرەتێ دبن ب شێوەیەکێ گشتی و ئافرەتا ئێزیدی ب تایبەتی، و هۆکارێن ل پشت؛ وەک داب و نەریتێن جڤاکی یێن پاشکەفتی، یان ژی گەرەنتینەکرنا مافێ وێ ژلایێ یاسایێ ڤە.
ئافرەتا کورد ئافرەتەکا ب هێزە و یا تژییە ژ هێڤی و ئومێدان کو مافێ وێ دێ هێتە گەرەنتیکرن ژلایێ یاسایی و جڤاکی ڤە ب ئاوایەکێ دروست و تەندروست، ژبۆ ئاڤاکرنا جڤاکەکێ یەکسان و وەکهەڤ و دوور ژ خراب بکارئینانا مافان. ژبەرکو ئافرەتا ئێزیدی ل شنگالێ تووشی خرابترین جۆرێ بێڕێزی و دەردەسەری و کۆلەکرنێ بوویە ژ ئەگەرێ ئەوا ب سەرێ وێ هاتی ل سەر دەستێ ڕێکخراوا تیرۆرستی یا داعش، و پەیرەوکرنا پیسترین کارێن تیرۆرستانە و شکاندنا وێ ب هەمی شێوەیان و هەمی کارێن دڕندانە ل دژی وێ هاتنە کرن، کو دوورن ژ هەبوونا مرۆڤایەتیێ.
پێدڤییە ئەم هەمی پشتەڤان بین بۆ وان ئافرەتێن داکۆکیکەر ژبۆ مافێ خۆ و هاریکار بین ژبۆ گەهشتن ب ئەوان مافان. دیسان ئەم ژ هەر ئالیەکی پەیوەندیدار دخوازین کو ب هەمی هێز و شیانێن خۆ ڤە کارەکی جددی بکەن ژبۆ ڕزگارکرنا کچێن ڕەڤاندییێن ئێزیدی.
ل دووماهیکێ دێ بێژین کو توندوتیژییا دژی ئافرەتان ئامیرەکە ژبۆ هەرفاندنا هێزا ئافرەتێ و بنپێکرنا بەهرەیێن وێ یە، ئەوا خودێ حەزکری دیار بیت و بەرهەمێ خۆ بدەت. هندی کە ئافرەت ڕزگار ببیت ژ ئەوێ فشارا کەسانێن دی بۆ دروست دکەن ژبۆ بنپێکرنا مافێ وێ، جڤاک بەرەڤ ئارامی و خۆشگوزەرانی و پاشەڕۆژەکا سەقامگیر ڤە دچیت.
توندوتیژی دژی ئافرەتێن ئێزیدی و ڕزگاربوویێن دەستێ داعش
