نزار عیسا نۆردینی
زارۆکەکێ جوان و بچویک ب ناڤێ ئومێد هەبوو. ئومێد د مالەکا بچویکدا دژیا، ئەوی گەلەک حەز ژ یارییان دکر. ڕۆژەکێ ل دەمێ ئومێدی ل دەرڤە یاری دکرن؛ وی دەنگەکێ نازک گوهلێبوو: میاو.. میاو.. میاو .. ئومێد لێ نێری، پشیکەکا بچویک یا رەش و سپیە، پشیک د بن دارەکێدا خۆ ڤەشارت بوو و دلەرزی!
ئومێدی گۆت: نەترسە، پشیکا بچویک، ئەز ئازارێ ناگەهینمە تە.
ئومێد هێدیکا چوو نک پشیکێ، پشیک ترسیا و خواست برەڤت، لێ پێیێ وێ یێ بریندار بوو. ئومێدی ب جانی و هێدێ پشیک هەلگرت و بۆ ناڤ مالێ بڕ، دایکا ئومێد نان و ئاڤ دانە پشیکێ، پشیکێ خوار و ڤەخوار و ب کەیف بوو. ئومێدی گۆت»ئەم دێ ناڤەکی ل پشیکێ کەین» دایکا ئەوی گۆت: کا تە چ ناڤ دڤێت لێ بکە؟ ئومێدی هزرا خۆ کر و گۆت: ئەز دێ ناڤێ وێ کەم بەلەک، چونکی ئەو رەش و سپییە.
ژ وێ روژێ، بەلەک و ئومێد بوونە هەڤالێن باش؛ هەر ئێڤار، بەلەک دهات و ل سەر پێیێن ئومێدی دنڤست. هەر دەمێ ئومێد گری؛ بەلەک دهات نک وی میاو …میاو… دکر و ئومێد پڕ دکر ژ کەنییێ و ئومێدی دەستێ خۆ ل سەر پشیکێدا دئینا و ئارام دبوو.
ڕۆژەکێ ئومێد نەخۆش دبیت، گەرما وی گەلەک بوو و دایک و بابێن ئەوی گەلەک خەم دخوارن. بەلەک ژی خەمگین بوو و ب ڕۆژ و شەڤ ل تەنشتا ئومێدی دما! بابێ ئەوی گۆت: بنێرە ئومێد، بەلەک تە ناهێلیت، ئەو هەڤالێ تە یێ ڕاستییە. دەمێ ئومێد باش بووی، وی و بەلەکێ دیسان دەست ب یارییێن خۆ کرن، نوکە ئەو هەڤالێن هەری باشن بۆ ئێکدوو. ئومێدی ب جانی و هێمنی گۆت:»سوپاس بەلەک و ماچ کرە پشیکا خۆ، هەردەم دێ هەڤالێ تە بم. ب ئەڤی ڕەنگی، ئومێدی و بەلەکێ گەلەک سالێن خۆش پێکڤە ژیان دەربازکر.