هونه‌رمه‌ند و نووسه‌ری كورد (حه‌مه هاشم) له ماوه‌ی رابردوودا چه‌ند كتێبێكی تایبه‌تی سه‌باره‌ت به هونه‌ر و میتۆد و قۆناغه مێژووییه‌كانی هونه‌ری شێوه‌كاری بڵاو كردۆته‌وه، له‌م ماوه‌یه‌شدا هه‌ر سەبارەت بە هونەری شێوەکاری سێ كتێبی دیكه بڵاو دەکاتەوە، كه کتێبەکان بریتین لە:
1. کتێبی (مێژووی هونەر؛ مێژووی مرۆڤ) لە ٦٠٠ لاپەڕە پێک دێت و ناوەرۆکەکەی بریتییە لە باسکردن و لێکۆڵینەوەی ورد لە قۆناغە مێژووییەکانی سەرهەڵدانی هونەر لەلایەن مرۆڤەوە لە پێش مێژوو و، سەردەمی چاخەکۆنەکانی بەردین و برۆنز و دواتر قۆناغی سەرهەڵدانی شارستانێتیەکانی مرۆڤایەتی، تا دەگاتە قۆناغی رێنیسانس و رێبازە هونەرییە تایبەتەکان هه‌روه‌ها هونەری مۆدێرن و پۆستمۆدێرن و میتامۆدێرن کە تازەترین تێماکانی هونەری جیهانین.
2. کتێبی (پەیکەرسازیی مۆدێرن) بریتییە لە باسکردنی سەرەتای سەرهەڵدانی ئازادی لە پەیکەرسازیدا و بنەماکانی هونەری مۆدێرن لە پەیکەرسازیدا، جیا لەوەی ئەزموونی هەندێک لە هونەرمەندانیشی لەخۆ گرتووە.
3. کتێبی (هونەری پۆستمۆدێرنیزم) بریتییە لەو بنەما و سەرەتایانەی کە بناغەی پۆستمۆدێرنە لە هونەردا، کە (ئایدیا) وەک چەمکێکی گرنگ و کاریگەر رێگاکان بۆ هونەرمەند دەستنیشان دەکات، هه‌روه‌ها گرێدانی ئه‌م بابه‌ته به بنه‌ما فه‌لسه‌فییه‌كانی هونه‌ره‌وه به گشتی.
شایانی باسە هونەرمەندی شێوەکار (حەمە هاشم) جیا لەوەی چەندین پیشانگا و ئەزموونی هونەری هەیە، تا ئێستا (١٠) کتێبی تایبەتیشی لەسەر هونەری شێوەکاری نووسیوە.
ئاریان دەرگەڵەیی – هەولێر