هێمن ئەسکەندەر – هەولێر
دوای یارییەکانی گەڕی بیست و سێیەمی خولی نایابی کوردستان، ژمارەی کارتە زەرد و سوورەکان کە بە ڕووی یاریزانان بەرزدەکرێنەوە لە زیاد بووندایە، ڕۆژنامەی هەولێر هەموو وەرزێک هەفتانە ئامار و زانیارییەکانی خولەکە بڵاو دەکاتەوە.
کۆمەڵێک ئامار لەسەر خولەکە
دوای تێپەڕبوونی ٢٣ گەڕ شێروانە زۆرترین یاری بردۆتەوە کە ١٤ یاریە، چوارقوڕنە لە کۆی ٢١ یاری کە ئەنجامیداوە ١١ یاری یەکسان بووە کە زۆرترینە، شێروانە زۆرترین گۆڵی تۆمارکردووە کە ٤٧ گۆڵە، سەیدسادق زۆرترین گۆڵی لەسەر تۆمارکراوە کە ٤٨ گۆڵە.
تا ئێستا ٤٦ لێدانی سزا بۆ یانەکان هەژمارکراون، لەو ژمارەیە٣٨ لێدانیان گۆڵیان لێوە تۆمار کراوە و هەشت لێدانیان بە فیڕۆ دراون.
رکەبەریی گۆڵکاری خولەکە بەهێزە، تا ئێستا فەرحان شکور بە تۆمارکردنی پازدە گۆڵ گۆڵکاری خولەکەیە، فرانسیس دادزی لە پێشمەرگەی هەولێر بە ١٣ گۆڵ لە پلەی دووەم دێت و بەڵێن فایەق یاریزانی چوارقوڕنە بە ١٢ گۆڵ لە پلەی سێیەم دێت، عومەر بیبۆ لە زاخۆ ١١ گۆڵی هەیە و لە پلەی چوارەم دێت، محەمەد والح لە شەقڵاوە ١٠ گۆڵی هەیە و لە پلەی پێنجەم دێت، محمەد خەلیل لە برایەتی و جۆرجی لویس لە یانەی زاخۆ و بیلال سالح لە یانەی شێروانە ٩ گۆڵیان هەیەو لە پلەی شەشەم دێن، گێلێرمی سانتۆس لە زاخۆ ٨ گۆڵی هەیە و لە پلەی حەوتەم دێت، نیعمەت عارف لە یانەی پیشەسازی و گەیلان بورهان لە چوارقوڕنە و فەرزندە محەمەد لە دەربەندیخان بە ٧ گۆڵ پلەی هەشتەمی ڕیزبەندی گۆڵکارانیان گرتووە.
ژمارەی کارتە زەرد و سوورەکان
تا ئێستا لە یارییەکانی ئەم وەرزەی خولی نایابی کوردستان لە ١٦١ یاری کە ئەنجامدراوە، ٤٠١ گۆڵ تۆمار کراون ڕێژەی گۆڵ بۆ هەر یارییەک ٢،٤ گۆڵە، لەو ژمارەیە ١٤٢ گۆڵیان لە نیوەی یەکەم و ٢٥٩ گۆڵیان لە نیوەی دوومدا تۆمار کراون، گەڕی یەکەمی خولەکە زۆرترین گۆڵی تێدا تۆمارکراوە کە ٢٤ گۆڵە، ڕێژەی کارتە ڕەنگاو ڕەنگەکان لەبەرزبونەوەدایە و ٧٠٤ کارتی زەرد بەڕووی یاریزانان بەرزکراوەتەوە و لە کۆی ئەو ١٦١ یاریەدا ٤٣ کارتی سوور بەڕووی یاریزانان بەرزکراوەتەوە، گەڕی شازدەمی خولەکە زۆرترین ژمارەی کارتی تێدا بەرزکراوەتەوە کە ٤٣ کارتی زەرد و ٣ کارتی سوورە.
ڕیزبەندی کلین شیت
دوای تێپەڕبوونی٢٣ گەڕ بەسەر یارییەکاندا ژمارەیەک گۆڵپارێز ئاستێکی بەرز لەگەڵ یانەکانیان پێشکەش دەکەن و توانویانە زۆرترین جار پارێزگاری لە گۆڵی تیپەکانیان بکەن، ڕیزیبەندی زۆرترین کلین شیتیش تا ئێستا بەمشێوەیە:
١- گەیلان سادق– یانەی هەندرێن ١٠ کلین شیت
٢- نیما عەزیز – یانەی دەربەندیخان، چوارقوڕنە ٧ کلین شیت
٣- عەباس یابر – یانەی ئاکرێ ٧ کلین شیت
٤- هۆگر عەلی – یانەی زاخۆ ٧ کلین شیت
٥- ڕەوەند عجیل – یانەی هەولێر ٦ کلین شیت