بەڕێوبەری گشتيی ناوەندی هاوبەشی هەماهەنگيی قەیرانەکان ڕایگەیاند، زیاتر لە 300 هەزار ئاوارەی شنگال لەبەر هێزەکانی پەکەکە و گرووپە چەکدارە نایاساییەکان ناتوانن بگەڕێنەوە ناوچەکانی خۆیان.
سێشەممە، 25ـی شوباتی 2025، سروە ڕەسووڵ، بەڕێوبەری گشتيی ناوەندی هاوبەشی هەماهەنگيی قەیرانەکان، لە کۆنگرەیەکی ڕۆژنامەوانیدا ڕایگەیاند “لە ساڵی 2014، حکوومەتی هەرێمی کوردستان، پێشوازیی لە دوو ملیۆن ئاوارە و پەنابەر کرد، هاوکات قەیرانێکی سەپێنراویش بەسەر حکوومەتی هەرێم داسەپێنرا تاوەکوو ئێستاش بەردەوامە.
سروە ڕەسووڵ گوتیشی: ئیستا نزیکەی ملیۆنێک ئاوارە و پەنابەر لە کوردستان ماون، هەروەها چەندین هۆ هەن کە بووەتە ڕێگر لەبەردەم گەڕانەوەی ئاوارەکان و تاوەکوو ئەمڕۆ چارە نەکراون. ئاماژەی بەوەش کرد، 350 هەزار ئاوارەی شنگالمان هەیە، لەبەر هێزەکانی پەکەکە و گرووپە چەکدارە نایاساییەکان نەگەڕاونەتەوە شوێنەکانی خۆیان، هەروەها حکوومەتی فیدراڵیش ئەو بابەتەی چارە نەکردووە تاوەکوو ئەو ئاوارانە بەسەلامەتی بگەڕێنەوە ناوچەکانیان.
ڕوونیشی کردەوە: ئاوارەی ناوچەکانی خواروو و ناوەڕاستی عێراق، لە هەرێمی کوردستان هەن، کە تاوەکوو ئیستا بەڵگەنامەی یاساییان نییە و شوێنەکانیان لەلایەن گرووپە چەکدارەکانەوە دەستی بەسەردا گیراوە. بەڵام ئەوەی جێگەی خۆشحاڵییە لێژنەیەکی باڵا لە نێوان هەرێم و بەغدا پێک هێنراوە بۆ ئەوەی کیشەی ئاوارەکان چارە بکات.
سروە ڕەسووڵ، باسی لەوەش کرد، ئێمە پێمان خۆشە ئاوارەکان بگەڕێنەوە شوێنەکانیان بۆ ئەوەی گۆڕینی دیمۆگرافیا ڕوو نەدات، هەروەها چەند ڕۆژێک بینیمان کوردەکانی ماددەی 140 چۆن مامەڵەیان لەگەڵ کرا، بۆیە ئەوەی لە کەرکووک ڕوو دەدات جێگەی نیگەرانییە، بەشێکی زۆری ئەو ئاوارانەش هی ئەو ناوچانەن، بۆیە پێویستە حکوومەتی فیدراڵی بە جیددی بێتە سەر هێڵ و ئەو بابەتە چارە بکات.
ڕاشیگەیاند “خەرجیی و تێچووی ئاوارەکان، زیاتر لە سەدا 80ـی لەسەر شانی حکوومەتی هەرێمی کوردستانە، حکوومەتی عێراق لەو بابەتەدا وەکوو پێویست هاوکار نییە و ئاژانسە نێودەوڵەتیەکانیش هاوکارییەکانیان بەشێوەیەکی بەرچاو کەم کردووەتەوە.